In gedachten kinnen we de haile wereld over reizen in ain poar seconden,

Van Valthermond noar Rome en van Peking noar Londen.

In gedachten goan we terug noar oans oalderlijke huus, hou´t doar vrouger was,

Of noar de legere school, woar de meester of juffrouw zo spannend veurlas.

De eerste smok, ’k wait nog precies woar ’t was en hou loat

En speulen bie ’t kaande van ’t daip of op stroat.

Gedachten kinnen oans bliede mokken, denken aan ’n mooi moment,

Het hoalen van oanze riebewies, troauwdag of de geboorte van ’n kind.

Mor soms binnen we zo in gedachten dat we niks heuren of zain,

Stoan stil bie degene woar we oafscheid van hebben nomen en vuilen oans allain.

Verdwoalend in gedachten rolt er zacht ’n troan

En zain ’t leven als film aan oans veurbie goan.

In gedachten kinnen we fantaseren, laifhebben, veroafschuwen, oordailen, verdrait hebben of overwinnen.

Gedachten, we kinnen ze nait aanroaken of zain, ze zitten van binnen

En woar we ook met oans gedachten binnen of zweven,

Gedachten… ze heuren bie oans leven.