door Jan H. Ottens

Soms denk ik wel es: woar doun ze’t van?

Nooit gain vastwaark en zeker twij keer per joar op vakantie met de caravan

Bie huus hebben ze alles ook dik veur elkoar

Niks op aan te marken, mor toch vinden we’t roar

Woar doun ze het van in dizze tied?

Nou kin de aine meer met de euro dan de aander

en sommigen willen de centen hailemoal nait kwiet

En as de mensen gain geld uutgeven, stoan we vot kloar om commentaar te geven

Ze binnen oaltied dag en nacht aan’t waark, geven gain cent uut, zo wol ik nait leven

De kniezebieters, volgens mie heuren ze bie de rieken

En as ze d’r nait meer binnen, gait de belasting d’r met strieken

Oaltied mor kraben en knoeien, mout d’r nait aan denken

Zit laiver lekker lui achter thuus en mie of en tou aine inschenken

In oans ogen dut de aander het nóóit goud

We waiten dan ook precies hou de aander leven mout

En ’t opvoeden van de aander zien kinder, doar waiten we wel road met

Ik had dit zus of zo doan en als’t mien kind west was, had ik heur of hom allaank thuus uutzet

Hou de aander het nait of wel doun mout

Dat waiten we mor oalte goud

Och, as je mor tevreden binnen met wat je doun of hebben in joen leven

Commentaar wordt d’r oaltied geven

Mensen blief oaltied joe zelf ondanks alle kritiek

Of je joe nou aarm vuilen of riek.