Jan H. Ottens

In gedachten goa ik terug noar vrouger, noar Valthermond,

hou het doar toun was, en woar alles stond.

Bedrievigheid alom, er was oaltied wat te doun,

schepen dei kwamen en gingen, mor ja, dat was toun.

Café’s, bakkers, smederijen en overal kruudeniers,

slagers, stelmokkers, melkboeren en barbiers.

Bie menig huushoalden was boeten nog de plee,

Max Engelsman zien sigaren en Albert Boarelds zien thee.

Achter ’t huus de schuddelbaanke met vledderstroeken

en woar de bakkers woonden, wat kon ’t doar lekker roeken.

Petroleumventers, kolenboeren, timmerlieden en snieders,

schounmokkers, schilders, kopersloagers en boderieders.

Bie Pras konden je terecht veur houden en petten,

ondergoud, borstrokken, knopen en dameskorsetten.

Gienus met de madde verkocht van alles, van scheerzaibe tot stopgoaren,

mor er waren nog meer stroatventers, de Jonge en Hagedoorn.

Aan kerken, scholen en café’s was in Valthermond gain gebrek,

de mensen aten toun reurom, poffert en dreuge bonen met vetspek.

Bie de kapper en café, doar heurden je oaltied staarke verhoalen,

salmiak, ris, en zuidhoalt dat konden je nog met lözze centen betoalen.

Appie Orsel was met zien zweefmeulen op elke kermis precent,

en met zulfgemokte vlaigers stonden de kinder uren in de wind.

Ook de ‘Oalen van doagen’ gingen nog opstap met bussen vol,

het was de dag van hun leven, wat hadden ze oaltied ’n lol.

En dan de voetbalclubs: Valthermond, M.V.K en V.B.

V.B. is d’r allang nait meer en M.V.K ging met Valthermond in zee.

Gerriet van Diek (Vami) en Roelf Suk (dubbeltje) reden  met de ijscokar rond,

ze verkochten ijs deur hail Valthermond.

En zo is d’r veul verdwenen, van veur tot achter in de mond,

och, ik ging zomor even in gedachten terug noar vrouger,

hou het hier toun was en woar alles stond.