Opa was met de poasdoagen

Wat aan´t fietsen met klaine Jan

En dei jong dee niks aans as vroagen

Opa wui d´r hoast moal van.

Opa, woarom draait ´n meulen

Oal weer de zulfde kaande om,

Mag ik nait bie ´t wotter speulen,

En woarom binnen bananen krom?

Opa, woarom wordt ain kikker

In´t wotter ´s nachts nait koald,

Wordt oans mamme oal mor dikker,

En ain ooievoar, wordt dei oald?

Woarom het opa ain kunstgebit

En zo weinig hoar,

Worden je van haardlopen ook fit,

En is lood zwoar?

Woarom is ’n brandweerauto rood

En ain kanarie geel,

Is ’n stoede het zulfde as brood

En zit in ain eerappel ook meel?

Stampot mous, is dat boerenkool

En is dat ook gezond,

Mouten alle kinder noar school

En binnen opa en oma geboren in Voalthermond?

Opa, dat wol ik joe ook nog vroagen,

Wordt ain poppie veuruut besteld

En kin zo´n ooievoar ´t poppie wel droagen

En´t bezörgen kost dat ook geld?

Jong, hoal op! schui uut met vroagen

Mainst doe dat dien opa alles wait?

Mor klaine Jan vruig niks versloagen

En woarom wait opa alles nait?